چاند پر LCROSS کا خود کش حملہ

جب خود گئے تھے تو تب بھی مٹی کے نمونے لائے تو تھے۔ لیکن وہ چونکہ استوائی علاقے (یعنی چاند کے خطِ استوا کے آس پاس) کے نمونے تھے جہاں دھوپ بہت زیادہ مقدار میں پڑتی ہے، اس لیے ان نمونوں میں پانی ملنے کا امکان ہی نہ تھا۔ اور اس وقت چونکہ انسان کو چاند کے متعلق کچھ زیادہ معلوم نہ تھا، اس لیے قطبین کے گڑھوں میں پانی کی موجودگی کا تصور کسی کے ذہن میں نہیں آیا ہوگا۔
اب انہیں چاند پر پانی ڈھونڈنے کی فکر اس لیے لاحق ہوئی ہے کہ وہ مستقبل کی خلائی مہمات کے لیے چاند کو بطور سٹیشن یا "بس سٹاپ" استعمال کرنا چاہتے ہیں۔ اس سے ان مہمات میں کافی سہولت ہو جائے گی۔ اور ظاہری بات ہے کہ سٹیشن پر رہنے والے لوگوں کو پانی بھی درکار ہوگا۔ اور پانی چونکہ وزنی چیز ہے اس لیے اسے زمین سے چاند پر لے جانے کی صورت میں بہت زیادہ خرچ آئے گا۔ چنانچہ کوشش کی جا رہی ہے کہ اگر چاند پر ہی کہیں پانی موجود ہو تو اس کو استعمال کیا جائے۔

السلام علیکم۔

موجودہ صورتِ حال یہ ہے کہ تصادم کا مرحلہ پرسوں بروز جمعہ، پاکستان کے موجودہ معیاری وقت (GMT+6:00) کے مطابق تقریباً ساڑھے پانچ بجے، یعنی عصر کی نماز سے کچھ دیر قبل، کامیابی کے ساتھ طے ہو گیا ہے۔ اگرچہ Centaur بوسٹر راکٹ کے تصادم کے نتیجے میں اس درجے کا روشن جھماکہ یا غبار پیدا نہ ہوا کہ جس کی بہت سے لوگ امید لگائے بیٹھے تھے، لیکن بہرحال، LCROSS پر نصب زیریں سرخ (Infrared) کیمروں نے اس سے پیدا ہونے والا حرارت کا جھماکہ ضرور دیکھا۔ اور ساتھ ہی اس پر نصب طیف نگاروں (Spectrometers) نے دھماکے کے ملبے میں سے گزرتے ہوئے سوڈیم کی موجودگی کا پتا لگایا جو کہ ایک غیر متوقع کھوج ہے۔
مشن پر کام کرنے والے سائنس دان LCROSS کے طیف نگاروں سے حاصل ہونے والے ڈیٹا میں پانی کی موجودگی کے سراغ ڈھونڈنے میں مصروف ہیں۔ اس مرحلے کی تکمیل کے بعد ہی چاند پر پانی کی موجودگی کے حوالے سے کسی نتیجے پر پہنچا جا سکے گا۔

اگر آپ پرسوں اس تصادم کی براہِ راست کوریج نہیں دیکھ پائے، تو اس کے آخری 6 منٹ کی ویڈیو یہاں پر دیکھی جا سکتی ہے۔
http://www.nasa.gov/multimedia/videogallery/index.html
دائیں جانب حالیہ ویڈیوز کی فہرست میں "NASA TV Coverage of LCROSS Impact" کے عنوان سے یہ ویڈیو موجود ہوگی۔ یہ وہ منظر ہے جو کہ خلائی جہاز نے گرتے ہوئے "اپنی آنکھوں سے" دیکھا۔
اور اگر آپ دیر سے یہاں آئے ہیں اور ویڈیو اب "حالیہ" نہیں رہی تو ویڈیو کے خانے کے بالکل نیچے "Video Archives" میں ڈھونڈ لیں۔

والسلام۔

تصادم کے بعد ابتدائی طور پر بہت سے لوگوں میں مایوسی دکھائی دی کیونکہ تصادم کے نتیجے میں کوئی بھی ملبہ گڑھے سے باہر نکلتا نظر نہیں آیا تھا۔ مثال کے طور پر Palomar رصد گاہ کی 200 انچ کی دوربین سے Centaur بوسٹر راکٹ کے تصادم کے 15 سیکنڈ بعد ہی کی یہ تصویر دیکھیں۔ تصویر میں Cabeus گڑھا بالکل درمیان میں پہاڑ کے پیچھے نظر آ رہا ہے۔

اس کی بارہ منٹ کی ویڈیو دیکھنے کے لیے یہاں پر کلک کریں

توقع تو یہ تھی کہ یہاں سے خلائی جہاز کے ٹکڑے اور چاند کی مٹی اڑتے ہوئے نظر آئیں گے لیکن ایسی حساس دوربین سے بھی کچھ نظر نہ آیا۔

لیکن اس سب کا مطلب یہ بھی نہیں کہ LCROSS کا مشن ناکام ہو گیا۔ بلکہ سائنس دانوں کا کہنا ہے کہ غیر متوقع طور پر تصادم کے نتیجے میں زیادہ ملبہ نہ اڑنا یہ ظاہر کرتا ہے کہ ہمیں جلد ہی چاند کی سطح کے متعلق کوئی نئی بات معلوم ہونے والی ہے۔ اور یہ بات اس کو ایک کامیاب تجربہ بناتی ہے۔
اب سائنس دان یہ پتا لگانے کی کوشش کر رہے ہیں کہ یہ نئی معلومات ہیں کیا۔ آگے آنے والے دنوں میں جوں جوں نئی دریافتیں سامنے آتی ہیں، وہ ان کا اعلان کرتے جائیں گے۔

ماخذ۔
SpaceWeather.Com (12 Oct. 2009)

ناسا نے زیریں سرخ طول موج (Infrared Wavelength) میں سینٹار راکٹ بوسٹر کے تصادم کے اثرات کی کچھ تصاویر جاری کی ہیں۔

یہ تصویر راکٹ بوسٹر کے ٹکرانے کے پندرہ سیکنڈ بعد اس کے 600 کلومیٹر پیچھے موجود LCROSS خلائی جہاز نے لی جس میں تصادم سے اڑنے والے ملبے کا تقریباً 6 سے 8 کلومیٹر چوڑا بادل نظر آ رہا ہے۔

یہ سینٹار کے تصادم سے پیدا ہونے والے گڑھے کی تصویر ہے جو کہ تقریباً 92 فیٹ یا 28 میٹر چوڑا بتایا جاتا ہے۔

ان تصاویر سے ظاہر ہوتا ہے کہ تصادم کی نتیجے میں کافی ہلچل ہوئی تھی۔ اور منصوبے کے مطابق باریک ذرات پر مبنی بادل بھی وجود میں آیا تھا۔ اگرچہ زمین سے یہ کچھ زیادہ متاثر کن نظر نہیں آیا لیکن در حقیقت یہ منصوبہ زبردست طور پر کامیاب ہوا۔
سائنس دانوں کا کہنا ہے کہ ملبے کی کم چمک تصادم کے مقام پر موجود مادے کی خصوصیات کا پتا لگانے میں ایک مفید سراغ ہو سکتی ہے۔

جہاں تک چاند پر پانی کی موجودگی کا سوال ہے تو محققین اس سلسلے میں فی الحال واضح طور پر کچھ نہیں کہہ سکتے۔ خلائی جہاز کے ڈیٹا کو دیگر رصدگاہوں کے ڈیٹا کے ساتھ یکجا کرنے اور اس تمام ڈیٹا کے تفصیلی تجزیے میں کئی ہفتوں تک کا وقت لگ سکتا ہے۔ ناسا کے مطابق، اس دوران جوں جوں نئی باتیں معلوم ہوتی ہیں، ان کا اعلان کیا جاتا رہے گا۔

مزید تفصیلات کے لیے ناسا کی 16 اکتوبر کی پریس ریلیز دیکھیں۔
http://www.nasa.gov/mission_pages/LCROSS/main/LCROSS_impact.html
مزید تصاویر یہاں پر موجود ہیں۔
http://www.nasa.gov/mission_pages/LCROSS/main/LCROSS_impact_images.html

پرسوں 13 نومبر، بروز جمعہ، ایک پریس کانفرنس میں LCROSS مشن پر کام کرنے والے محققین نے اعلان کیا ہے کہ تصادم کے مقام سے اڑنے والے غبار میں پانی کی موجودگی کی تصدیق ہو گئی ہے۔ یعنی جہاں پر راکٹ اور خلائی جہاز گرے، وہاں پانی موجود ہے۔

تصادم کے موقع سے اب تک سائنس دان LCROSS سے حاصل ہونے والے ڈیٹا کے تجزیے میں مصروف ہیں۔ اس سلسلے میں انہوں نے خلائی جہاز کے طیف پیماؤں (Spectrometers) سے حاصل ہونے والے ڈیٹا پر خصوصی توجہ دی کیونکہ وہاں موجود مادے کا پتا لگانے میں اس کا اہم ترین کردار ہے (طیف پیما ایک آلہ ہے جو کہ کسی مادے میں جذب یا اس سے خارج ہونے والی روشنی کے تجزیے سے اس کی شناخت میں مدد کرتا ہے)۔ اب تک کے تجزیے سے یہ بات یقینی ہو گئی ہے کہ چاند پر تصادم کے مقام پر پانی موجود ہے۔ البتہ یہ وہاں کے علاقے میں کس انداز سے پھیلا ہوا ہے، اس کی مقدار کیا ہے، اور اس کے علاوہ وہاں اور کون سے مادے موجود ہیں، ان تمام سوالوں کے جواب پانے کے لیے ابھی مزید تجزیے کی ضرورت ہے۔ خلائی جہاز سے حاصل ہونے والا ڈیٹا بہت زیادہ ہے اور اسے پوری طرح سمجھنے میں کافی وقت لگ سکتا ہے۔

مزید تفصیلات اس صفحے پر دیکھیں۔
http://science.nasa.gov/headlines/y2009/13nov_lcrossresults.htm

ناسا کی طرف سے 21 اکتوبر کو آنے والی اس رپورٹ میں اب تک ہوئی مزید تحقیق کا خلاصہ دیکھا جا سکتا ہے۔
http://science.nasa.gov/science-news/science-at-nasa/2010/21oct_lcross2/

مزید تحقیقی مواد کے لیے LCROSS مشن کی اپنی ویب سائٹ دیکھیں۔
http://www.nasa.gov/lcross